終極二篇

  嘩!嘩!嘩!~~一連三篇,一篇再篇,真係從未有過,此生不再,結業大出血呀~米話我冇野講所以封筆,茶實係我唔想講啫.非不能也,乃不為也!

有時D人真係好奇怪,打左咁多篇野都冇人問津,可能見我話唔想再打BLOG就突然多野問左,雖然真係唔想再講,不過既然已收山就不防再多講少少,不過都係果句,要講既之前講左,唔講既就唔會多講,所以基本上我再講的也是之前講過,只係冇心人睇有心野啫.

    技術分析有好多種,只要用上自己認為合用的就夠了,其他的知道也就足夠,因為每種都有佢既好處同壞處,就好似之前我提及過的"移動平均法"只係簡單地用最簡單的平衡線來買賣,但應該唔會有人會用,因為平衡線的壞處就係反應遲鈍,沒有超前性,但你只要明白佢背後意義,佢其實係一種風險最低而又精確的分析工具,只係風險越低回報就自己越低...嫁啦.如果有一種係百分百準確的我留來自己用同發左達啦,點會同人分享呢?!.....有一個比喻其實幾好,就係從前預測天氣的器材有好多種,如果同時用佢地黎測天氣就會出現好多唔同的信號,會分別指向晴天,陰天或雨天,咁你信邊樣好呢??就是現今科技發達,天文台都經常比我插啦,但所謂天有不測之風雲,只要大部分時間係準既,佢只會比你淺插,好難先可以插入深處.....同樣地技術分析好多時都會有不同的信號,我們不能全用,只能選擇地相信其中一,兩種,也當然不能要求經常準確,大多數時間準已能令人長勝了,所以與其哂時間去研究多種工具,就不如係其中一,兩種下多些苦功,等到差不多時侯你自然會知道需要加多或減少.我自己有時會用4,5種方法來確認市況.

   另外有一個很現實的,就係如果想投資有小成,平常人係需要有5年"全職"炒股的經驗的,唔好以為學懂了幾種分析就以為可以輕易賺錢,如果係咁簡單早就冇人工作了.我又打個比喻.....如果有人係垃圾堆中拾到一本市面賣緊十元的絕世劍冊,練成之後就出黎行,當遇到街邊流氓時耍兩招就赫死人啦,但遇到高手時就死得,因為佢跟本唔知用咩招式來對付高手,只會係度自己耍所學的劍招,高手等佢耍完一輪後睇準時機就一招將佢了結....同樣道理,你知道好多分析公具時,冇實戰經驗就只會照書出招,唔會明白好多隱藏的殺機,係米真係咁容易呢??如果你同我講~唔係喎,我學完之後炒股真係有錢賺喎!~咁就唔該你去照下X光,睇下自己係米骨格精奇,天資聰敏,係百年難得一遇又萬中無一的絕世奇才,如果唔係就請你睇下當時形勢係處於咩市況,如果係牛市賺錢係好應該,否則唔死都冇咩特別用途,而如果係熊市就睇下係米長期都賺錢,因為只有係熊市都能長期賺錢的炒手先叫高手.可能我見識少,我未聽過有2年能成高手的世外高人,如果佢自己話係請你自己選擇信唔信,我敢講就算有高人指點,都只會教識你招式,而最重要的一環係冇得學的,而如果係自學既要走既路會更崎嶇,呢點從前已提過,下文也將會再講.

    五年小成十年大成呢句我也提過但唔係我講既,係前輩經過自身的經驗後所出的,當然好多初哥係唔會信,總以為自己有別於常人,包括小弟當初睇到都唔信,但經過2年幾的全職後,係絕對有理由的,所以我比自己5年時間黎睇下自己係米識合以炒股為生....我自問天資唔會低於平常人,加上自學十幾年前睇少少本書,但都發覺睇得多唔代表有用,真正有用既原來係經驗,當然!知道得越多對實踐係好有用,點都好過咩都唔知,就好似家父咁炒左幾十年股都係咁既樣,當然由於家父唔係全職,到佢所謂全職時都幾十歲人,有心都無力啦....所以我敢講句,如果唔係全職而只係間唔中得閑睇兩眼大利市機的股友,要有小成談何容易,倒不如用跌市平均法作中長線投資反而勝算高D.唔信可以自己試下!當然!又不可一蓋全論,自身努力係好重要,如果加倍用功可能會把成功時間縮短都唔定,但我上一篇提及的果位高手,如果冇記錯佢都用左差不多5年時間來研究不斷獨創技術先有今日成績,佢開始時都不停輸超過百萬呢.

還記得我提過80/20比率嗎??唔記得我再提多次,80係指心戰,20係指技術,可想而知心戰係重要過技術好多,呢個當然都唔係我講嫁啦....炒股最重心理質素,而心理質素正正係冇得學既,只有確自身來段練,所謂5年10年其實最重要係學心戰...有好多人可能明白止蝕的重要,但我就聽過好多人話如果跌到咩咩位就會止蝕,但真係到位時又會有好多理由而做唔到,因為係割肉之痛麻,如果要做到割肉而唔多覺痛,你話要割幾多次先會感到麻木??但當你經過唔割肉而失血太多時,你就會知道割肉果下痛對比將來的痛只係少痛時,你先會發覺止蝕的重要性,單就呢個過程你話要用幾耐時間先可以麻木地機械式運作呢??之後重有大把經歷心戰既野要學,你話5年長唔長??你只要問下自己買左幾多年股票,有幾多次係按入市時定下的止蝕位決斷地止蝕,你就基本可以計算到自己去到咩級數,而不要忘記止蝕只係第一步呢!你又究境行出左第一步未呢??浪花濤盡英雄,多少人為此而折腰??有幾多人因為過唔到呢一步而十年如一日呢??炒股為生絕唔係你想像中的簡單....而由於要排除炒股期間所賺的錢係一時幸運定係牛市應該賺的,所以最少要5年時間經過起跌而死唔去先知有冇小成,而如果真正以全職為生的炒手更會知道,經過十年全職生涯都還可生存的就一定有佢本領,呢點我炒左2年幾就以完全感受到.

    我有位朋友年幾前唔知發咩神經突然話想學投資,我就好有心咁叫佢由基本知識學起,唔可以太急,所以佢當時買左幾本投資書,我睇都睇過下,而其中一本係我都覺得算唔錯的入門書,上一篇文已推介過,如想買的可PM我,,其他既講真就冇咩用,也可以話佢未需要用到,因為佢呢D入門級睇左都唔會明,要真正炒過一段日子先會感受到,就好似我十幾年前睇既書咁,好多都係要到家下先明,所以條友家下經常叫我飲下午茶,順便話"研究"下D股票喎,不如話叫我指學下佢好過啦.HAHA....不過,睇到條友開始有D問題都幾到肉就知佢有D進步,而我覺得佢比我幸運,因為起碼佢有唔明都可以問我,我知道既都一定答佢,能理解幾多就要睇佢自己,我真正所能幫佢的其實真係唔多,因為我本身所知的也只是皮毛,但起碼佢行少左好多路,最起碼會比我少.

而我最後想講既,就係推介下我自己寫既野,如果對投資有性趣想學但又唔係幾識既可以重頭睇起,睇左唔明既唔緊要,咁只證明你真係咩都唔識,就請你自己買D最基本既投資書黎睇....而如果自問係好掂既相信你唔會睇到我講既野,因為你根本睇我唔起,....但如果覺得自己係識識地既就一定要一睇而再睇,因為我敢講你一定會有所得著,唔明就再三睇,都係唔明既就真係對唔住啦,咁可能你自己以為識識地但其實一D都唔識,如果係都要話自己識既,就煩請各下去做下腦部素描,因為絕對唔會係我既問題.哈~哈~