剛和友人講起唔想再打BLOG出文,友人問點解唔直頭CLOSE左佢,還要更新投機倉?!咁係因為我唔甘心,唔甘心個倉炒左成年都賺唔到錢不突只,重要輸緊一萬七千蚊,我話假設有人比面跟足我買,應該都唔會高興啦,如果突然結業米收唔到科??誠然!最大的錯係買左2357&1198呢兩隻孖草,重要一味睇好講前景,又唔願止蝕,最終攪到自己泥足深陷,呢點真係有為自己定下的投資原則,但小弟都係人,自然會有人性的弱點,也有大錯的時候,到發現時已騎虎難下,家下只有等運到....當然,如果你話同開倉恆指比都唔係差好遠啫...但此言差耳,首先係自己錯得離甫,加上如果只能同恆指升跌一樣咁重學咩炒股?!是旦買D同恆指相關係數差唔多的股或直頭買2800米得囉??....君不見幾乎每日都有股票創52週新高,又每日都有創52週新低的股票嗎??為什麼自己會買中一些弱勢股呢??然而買錯冇所謂,係人都有錯,只係錯左冇即時作出改正,攪到今日如此田地啫,呢點我一直原諒唔到自己,就算將來能返家鄉,都已錯失好多時機啦.....如果有睇開小弟賤文都知道我強烈要求自己升市時賺多錢,跌市時唔賺都唔好輸,呢個係我炒股目的,如果升時就賺跌時就輸邊個唔得??如果升時賺少少跌時輸多多,咁就不如攞D錢造定期好過啦,駛咩白白養股票行呢!
我呢大半年一直都係度諗,如果唔係投資三草既時機太差,又一味死牛一邊坐住D草貨,令自己只能動用3成資金TRADE,咁會唔會賺得多D呢?!....曾經有一刻想過好唔好沽清長倉而把資金靈活運用會更有希望呢??但就好似我早幾日用武俠小說作比喻(其實每一段都有深意,只係唔知有幾多人明),慾練神功,必先自散武功,即係話如果想早些返本就先要沽清D蝕本貨,然後重新開始,可能會開新一片天,但正如之前所云,世間能得幾人?!知易行難啊~~
今天,有網友好有心咁返睇小弟之前的劣作,佢話好好笑同生鬼喎,呢點同個人性格有關,更知道要人睇就要寫得特別D,要有少少與眾不同先得,如果唔係千篇一倫只係講D財經喎,鬼睇你咩?!睇財經新聞同D講股佬吹水米重清楚....不過,小弟打隨筆的原意係想比一D唔係幾識投資或唔係幾懂技術分析的股友,但又想知道一D基本分析的股友參考的,呢點係小弟早期劣作已表明,只係唔知有冇人睇啫,記得好耐之前曾經有位網友不過記得邊位講過,佢將小弟所有隨筆都COPY左慢慢睇,講真當時真係幾開心嫁,起碼有人識因相麻,可惜YAHOO更新後D留言冇哂,搵唔返邊位咁有心啦,希望佢有一直支持吧!
當然,我早期講的所謂炒賣技術都只係一D好基本既野,但我可以好大膽咁講,睇得通好過你去睇一D市面上好技術多書,雖然我唔知家下D書講D咩,但就我多年前所睇的書,家下都唔知幾多係有用,呢點早幾日又比喻左...好似咩陰陽燭,,趨勢線,形態,道氏理論,平均線等等等...呢幾樣咁簡單既野都可以每樣用一本書黎講,可以話係多舊魚,但其實來來去去都係講果D野,呢點我之前已提過,可能係書商要賺錢吧,又可能係我膚濺睇唔明啦.反而江思理論麻,可能真係要用一本書黎講,但如果冇一定基礎就冇必要睇,因為真係好麻煩,可能我蠢吧!....當然我所提及的炒賣方法麻,就我自己而言都可以的,要明白可能都要有少少基本知識,但我又冇可能從最基本講起,不景呢D又唔係話三言兩語可說清,有心想學基本的可以自己係書店買,而如果唔知買邊本既可以用私人回應黎問我,呢本係我朋友買左比我睇過下既,雖然係好基,但都算幾全面,記得我已向網友提過,如果知道的就不用多言,因為冇謂幫人賣廣告啦.
又有網友話係米我已冇咩好講所以唔再打,呢個當然唔係啦,講真要講有關投資既野我重可以有排講,不景在下睇左不下40本有關投資書籍,加埋多年炒股經驗,有冇用就見人見智,但想講就唔會冇野講,單係點睇盤路同一D即市要留意的就可以講幾篇,只係唔想講,因為我覺得睇得小弟既就應該唔會懂太多,既然唔懂得多講得深既就未必會明也未必需要,懂得多既就有自己的系統就無需要睇我,所以也冇需再講,因為我始終覺得呢家野只需要知基本野然後再加自身學習再加經驗,然後自身溶會先有用,人地講得多唔合已用係只會亂,呢點又係之前比喻暗示左....就我所知有人可以從基本野用到可以自身研發到獨步股壇的技術,呢點小弟真係十分敬佩,不過一分錢一分貨,人家用了大量的時間和收集資料數據才能做到,可以話係用時間來換取金錢,呢點小弟就冇法就到,所以人家賺多錢自己賺唔到錢.....但~退而求其次,用一些傳統的分析都可以賺錢,只係不及人家罷了,呢D係冇得求的,就好似平均線咁可以話係最簡單的技術工具,高手可能會不以為然,但很出名的黃瑋傑就經常用佢黎分析走勢,所以話沒有東西係冇用的,只係睇你運用成點,要求高唔高,人家賺錢係有人家的理由,與其臨淵羨魚就不如退而結網,所以小弟也只好不停學習,希望唔好再咁失敗.
最後想講既係唔知有冇股友有留意到,最近大旱已令農產品長期失收,由其玉米價格高漲不下,呢點有咩影響就自己諗下,不景投資係需要留意多D事物同思考.共勉之~
投資冇必贏,只求勝算高!
目前持股:3988,2357,1198,883,3998,933,3983.3800
(2011年7月25日開倉,目的只為自娛,絕無推介成份,非誠勿擾!)
十五萬元投機倉 開倉恆生指數:22445 | 1月$40000 | |||||
股票代號 | 買入價 | 買入股數 | 沽出價 | 沽出股數 | 盈/虧 | 投資金額 |
(10/8)1198 | 2.71 | 2000 | $5420 | |||
2357 | 4.06 | 12000 | $49020 | |||
1198 | 3.515 | 8000 | $28320 | |||
| (23/7)3983 | 4.5 | 4000 | $18100 | |||
| (5/7)3998 | 2.05 | 10000 | $20620 | |||
| (23/7)933 | 1.51 | 8000 | $12180 | |||
| (11/7)933 | 1.53 | 10000 | $15400 | |||
| (6/7)933 | 1.59 | 10000 | $16000 | |||
總投金額$ | $176360 | |||||
可用結餘$ | $6343 |
沒有留言:
發佈留言