遺忘了的樂章

        星期六,冇節目,一個人在家唔知做咩好,又冇新戲睇,諗左好耐突然想起已經成十年冇用喇叭聽音樂.....自從個仔出左世後,因為唔可以太嘈,加上內子對音樂一D興趣都冇,再加上佢又係唔嘈得,所以一直都冇機會聽,其實都好慘,對喇叭跟左我二十幾年,已經唔係幾比機會佢出聲,重要打佢入冷宮咁多年.唉!....可能會奇怪點解唔用耳筒聽?!但其實好多人都知道根本係兩回事,就好似有D人會聽幾萬元的音響但就唔會聽幾千元的耳筒,因為身體都可以感受音樂喎....

        由於太耐冇聽啦,左睇右睇,都唔知聽邊隻好,諗左一陣終於決定聽老柴三大芭蕾舞曲中的天鵝湖,原因係"天"對我有點意義,因為我第一次聽的音樂就係中3時一位女同學送我的"天"卡式帶,好明顯佢係暗戀我啦,HAHA.....之後我第一隻買的音樂CD碟也是"天",所以我決定聽呢隻精裝版(足本版太長,時間有限),然而當我入左隻碟播放時才發現原來對喇叭一直都冇接駁喇叭線,攪到我又要搵線又要駁線整到身水身汗,成個鐘後先開始正式聽.呢隻JVC雖然唔係用VICTOR個名出品,但D聲真係幾好嫁.日本仔既"AV"果然極有水準呢.HAHA
 

        聽音樂當然唔少得樂器之王鋼琴啦,而日光日白又唔會聽獨奏咁乾旱啦,於是聽完"天"後就選擇左耳聾芬的第5鋼琴協奏曲,因為呢隻除左有我喜愛的鋼琴外,我覺得都有老芬的交響樂震撼一面....邊聽之餘又自然回憶一D舊事,記得我大慨二十歲時突然好起歡一部叫"THE PIANO"的西片,唔知點解就一下子鐘意左PIANO....人就係咁,會好突然咁鍾意一D野,我當其時真係有衝動想買部.....電子琴反屋企玩下嫁,不過我又知道只係3分鐘熱度,加上呢D野係要從小開始的,所以都係聽下就算啦....還記得有部台灣片叫"不能說的秘密",戲中的一幕琴戰令我全身發熱,更突然好欣賞周傑倫呢條友(一直都唔係幾鍾意佢),當然!更令我觸目的是戲中的女配角....聽下諗下咁又聽完一隻.

  

         中國人麻,當然唔小得聽下中國人的作品啦,"黃河"同"梁祝"就絕對不能不聽,明顯同西方的味道好唔同...而係未有"朗朗"同"李雲迪"之前,"孔祥東"係當時最出名的華人鋼琴家,所以呢隻"黃河"經佢手都彈奏得非常出色,而呢隻"梁祝"就非常特別,因為佢係二胡協奏曲....如果比起"西崎祟子"的小提琴版麻,呢隻二胡版我就覺得比較更淒涼D,可能因為本身二胡而比人有滄涼的感覺,更能突顯出梁山伯與祝英台的淒美古事.

  

         聽完"梁祝"已差不多5點,真係有D耳油未盡,決定聽多一隻就去食飯,而最後一隻就絕對絕對不可不聽"喜多朗",呢位應該好多人都識,就算唔識都一定聽過佢既作品,唔好見佢成個真理教主麻原彰晃咁就以為佢冇咩料到,但其實佢係近代樂壇算係數一數二的音樂創作人,好多電影劇集都會出現佢既作品,由其佢早期以電子音樂創作為主,比較起西方樂器係絕對唔同的感覺,令人有天馬行空,元神出遊的FELL,而後期創作更加入中西樂器,又上高峰.....呢隻係佢係美國的音樂會現場錄音,比起佢平時的錄音室CD,音場好闊,空間感好強烈,係我咁多隻CD中最愛的一隻,而且係爆喇叭的極品,我都驚驚地我對太耐冇開聲的700仔會頂唔順....聲完之後覺得有少少耳鳴,可能隔離左右憐社已經小左我幾個鐘呢.HAHA.....不過都冇計啦,咁耐冇爆過,下次又要等到自己一條友先可以再聽,真係唔知要等到幾時,唯有一次過爆到夠啦.

    晚飯過後,有網友竟突然來電話到左我家.......村口商場!!實在令人意外....咁就順便大家搵個地方坐低吹下水啦.....咁又話吹左2個鐘,OH~時間真係快過,攪兩攪就話一日,做兩做又話一年,吹兩吹又...........