熊出沒注意?

   最近外圍股市急插,美股更跌穿所謂的200天牛熊分介線,而港股早於上月已跌穿250天線,更有人已提出港股已步入熊市,咁係米真係"熊出沒注意"呢?.....

   用得牛熊字眼就一定係要用"道氏理論"啦...根據道氏理論,牛市有三期,熊市又有三期,不過唔理佢有幾多期,有一點係好重要,就係要步入熊市必先出現牛三,而牛三有很多特點,但所有特點都可以用一個字蓋括---狂....咩叫做"狂"?如果有幾年股齡的回想一下2007年就會知,連拾紙皮的亞婆,食白粉的道友都想用救命錢來買股票時,就為之狂啦...小弟經歷過紅籌國企狂,地產狂,科網狂,直通車狂,所以好確定現在絕對唔係牛轉熊,反而你話從未牛過,現在只是"熊二"重令我信服....而從"波浪理論"黎睇,佢有好多重點都同"道氏"相似,只不過"波浪理論"可以係大趨勢又可以係小氣候,太多不確定的變化,可以話係"橫看成嶺則成峰,遠近高低各不同",所以我唔鍾意佢,不過用佢黎睇恆指週線圖,從萬一升至二萬四又真係好似完成左5個上升浪,但呢個上升浪係"牛一"中的一浪,定係"熊二"的反彈浪,又或係咩咩浪就真係睇你點數啦....

   但其實從短,中線炒手黎睇,大市處於咩時期根本唔重要,因為你只係想捕捉短,中期的機會,大市的牛熊期對你係冇幫助,反而注意個股走勢更重要,點解咁講?因為個股本身都有牛熊期,例如:2369由幾毫子炒到上6蚊50,60倍PE,你話佢係米出現左狂牛?又由6蚊跌落去個幾你話係米熊市?...所以一再提出止蝕的重要性,我唔理佢係牛係熊,係龍係蛇,只要到左止蝕位就沽出,咁重洗咩驚?....至於要分析牛熊者都只係一D長線投資者,因為一名出色的長線投資者EQ係好高的,佢會等"熊3"滿地鮮血時出手,等到"牛3"煙花盛放時沽貨,十年先做個兩,三次買賣,牛熊就變得極為重要了.

   題外話:昨晚去左飲花酒(我請),所以遲左打BLOG,剛睇新聞至知,原來S&P降左美國評級,其實之前都打晒開口牌,所以唔出奇,如果S&P唔做野反而重奇,而打後都重有機會再降級,重有兩間如無意外都會跟住做....今次S&P夠擔帶頭郁老美百年基業,可想而知美國已是神枱之吉...美國已出現疑似雙底衰退,要佢大幅減赤無疑雪上加霜,兩党議員為左選票當然唔會咁做,未來美國舉債度日就一定,經濟都好大可能好似日本咁十幾年不震,其實各大國如中國,俄羅斯都好想你美國佬唔掂,不過就當然唔希望佢一下子散晒啦,最好就係慢慢咁衰,比時間人落車,然後上佢地架車,等中,俄可以慢慢取代...

    至於降級會有咩影響呢,就真係唔清楚,自然會有分析師出黎講野,而股市連跌多日唔多唔少都反映左,呢D野對大戶黎講唔係秘密,睇返昨晚美股先急跌後回升,成交又係近月新高,有D壞消息入貨FEEL,所以港股星期一都唔一定會再大跌....其實市場最擔心都係降級會否導致,美國債息同企業債息上升,企債息升自然削弱公司盈利,咁國債又係米真係會被市場沽售呢?....睇返最近外匯情況,資金都流去安全的貨幣,連經濟唔多好的日圓都急升,資金其實已無路可走,而買美債資金都係安全錢,都係D退休基金,保險公司,及各大國...各大國就冇計嫁啦,睇下其他會點,不過已現時睇,雖然話降左級,但都重係AA+,外邊風大雨大,走得去邊?颱風風眼係最安全的,呢D錢又唔會走去股市或匯市及其他地方既....不過港息就有機會上升,供樓人士就可能再冇低息優惠啦,至於樓價又唔一定會跌,以前十幾厘息都係咁升嫁啦,最重要係有通漲麻.

收市:其實都冇咩好講,大市要跌都唔會話一跌到底,超跌自然會反彈,彈到21500睇下點先算....現睇下亞伯會否出皇牌---QE3,市場都已憧憬佢會出皇牌,如果星期二晚佢唔流D口風出黎,咁就真係唔知個市會點,現做法都係個幾句,貨多反彈減D,貨小睇定D...一個字---等,反正估都係冇用,不如等市場話我知重好!

(以上只是個人吹水,唔鍾意都冇計)

目前持股:3988,3938,2357,1198,38,883,,856,515,826

YAHOO新回應會排在最後,有D白痴,見唔到回

應請看下一版,如回應文字太長時可能就咁睇

唔晒,只要點按回應最後一個字後小小就會

出晒.


註:如不能留言或出唔到大頭相和假名.....

請到自己個BLOG度UPDATE新版YAHOO

(2011年7月25日開倉,目的只為自娛和跟老友競賽,絕無推介成份,非誠勿擾!)

十五萬元投機倉 開倉恆生指數:22445
股票代號	買入價	買入股數	沽出價	沽出股數	止蝕價	投資金額
(25/7)3938	0.86	20000			0.75	17300
(4/8)826	1.73	10000			1.62	17400
(25/7)1198	3.58	4000			NIL	14420
(1/8)2357	4.6	4000				18500
(28/7)1198	3.45	4000				13900
(5/8)856	1.83	6000				11080
					總投金額$	92600
					可用結餘$	56510