賺小利

          有朋友睇左我上一篇隨筆後,話有冇咁易賺錢呀???......我同佢舉左個例....有冇同人打過麻雀?有冇見過有人打麻雀長期打10次贏7~8次,但有人打麻雀長期就輸7~8次?如果你問長期贏錢條友係米好難先贏到錢,佢一定答你"唔係"囉!....咁成日輸錢條友又係米唔識打麻雀呢?佢一定會話佢"識打"囉!

           咁問題出係邊度呢?.....識食糊,識造牌,識數番就已經可以話識打麻雀,大家都識呢D野點解有人長打長贏呢?......呢個就係贏家懂得睇形勢,知道咩時候扣牌,咩時候棄糊,咩時候造大牌,咩時候鬆牌比下家,叫咩牌機會大D,打咩牌出沖機會細D.......高手一起手睇牌就知勝算有幾多,攞幾章牌就知要點造,係有晒系統咁打,所以長打長贏.

           炒股都係一樣.....買股票時有冇想過跌幾多就止蝕?有冇想過升幾多止賺?......如果買入後股價的走動和自己預計的不同時要點做?就算已定好晒計劃,到真正要行動時又會否照計劃行事?..........好多人買股票都賺過錢,但有好多人係唔知點解會賺錢,總之買左見佢升米放囉,如果連點解賺錢都唔知,咁有咩可能會長期賺錢?.....就好似打麻雀咁,運氣好時,想要咩牌就黎咩牌時,當然容易贏錢,但運氣係冇可能幫你長期贏錢嫁,如果只單靠運氣,你便是長期輸錢果個囉.....

           要長期炒股贏錢(小利)首先要知道點解上次會賺錢,係米因為自己已洗楚間公司做咩生意?間公司係米真係好賺錢?同其他同業比較係米平過人?最重重重要係買入的時機---股票係米處於上升勢?如果連係米上升勢都唔知就幫你唔到啦......曾經睇過一本書,裡面話大多數人會入市買股票係因為股票在升,而大多數人賣股票係因為股票在跌......所以一隻股票的升跌係同基本因素冇必然關係,股價的升跌在於有冇人買呢隻股票,所以當股價開始升時,就會自然有人跟買,越升越多人買,升起上黎佢唔會咁快停,總會升一段時間.....相反,當股價下跌時,佢就會比人沽,越跌就越多人沽,就算已無人沽都會因為冇左買盤而自己下跌,呢D同基本因數無關,係完全決定於供求........有好多人會買D跌左好多的股票,問佢咩原因買就係因為"平囉",佢地以為個股曾經見過$10蚊,現在$2,3蚊重唔叫"超平"?由$3蚊升左去$10蚊就叫做"超貴"?,佢地能夠賺錢我敢講係撞彩,我也敢說佢地冇可能長期賺錢,輸大錢係早晚的事,因為佢地根本唔知點解會賺錢同輸錢,買左升就沽,跌就坐住又唔知點算好.......很多時D人都會奇怪點解隻股票咩都好,但就係股價唔好唔識升,咁請你睇下圖表,隻股係米處於下跌勢,唔好再單睇基本面啦.......

          講左咁多野係想比人知道買股票要賺錢最重要係時機同個趨勢,贏輸關鍵在於機率,買一隻處於上升勢的股票贏錢機率一定大過買下跌中的股票......要明白點解自己會賺錢,唔係靠運氣,係靠自己真正了解個股的走勢而買入,就算睇錯都唔重要,冇人係可以次次都買中的,只要快速止蝕,保本留給下次機會就OK,......你已知道賺錢原因,你就會知道機會是經常有,最重要係你有冇錢,所以保本係最重要,而要做到保本的唯一方法就係快速止蝕........只要入市前定好策略,按自己的系統行事,最重要係尊守策略,唔好再係唔知咩原因下買股,又唔知咩原因下賺錢和輸錢,咁就好容易長期賺小利......要賺厚利就需要有逆向思維,和很高的心理素質,同技術已冇太大關係囉.....

                                          (以上只是個人見解,不同意都冇計)

                        目前持股:3988,3938,2357,1117,1198,1157,883,38,210

        一直都很想開個投機短炒倉,但由於短倉內反覆都有股票而沒有足夠資金,也由於唔識整個表......而近日沽出一些短炒股後,已差不多有10皮野,整表的技術難題也出現新突破(真有賴高兄的指點呢),所以終可細細地開個十萬元投資倉,目的是睇下自己有冇本事跑贏恆指......而由於只有十萬,所以買賣時都以小注小心為上,因此會經常出現我買但個投機倉唔買,又或我沒錢買只好用投機倉買的情況.....不過其實冇咩所謂,因最終贏輸都係我的錢,而最終係想跑贏恆指和比自己一個目標啫....但首先聲明,呢個只係小弟自己同自己玩和跟老友比賽,絕無推介成份!

                                09:37          投機買入3938          $0.86 X 20000

                                10:15          投機買入2222          $4.17 X  5000

                                11:54          投機買入1198          $3.58 X  4000

        收市:     今日係開倉大日子,昨日已諗定今日會買D咩,由於呢個倉主要係跑贏恆指,戰勝老友,所以會買D我覺得安全的股票......首先係3938,呢隻野我之前$0.6左右收左幾注,也曾向友人推介,可惜冇人理我,最後同友人輸賭話會見$1.2,雖然我坐左超過半年,但佢真係升足100%,令友人都大說走寶,重贏左花酒,所以呢次要預佢,我相信今次出業績唔會令我失望,本來想入40000股,但一來自己已有貨,二來唔知佢幾時開車,所以留多D錢作其他投機.......1198我係十分睇好,投機倉點可能冇佢?再跌再加,.......2222呢隻就真係投機啦,本來想入10000股,但睇圖已差不多超買,可能升埋明天要回吐,唔入咁多啦......

   

十萬元投機倉      開倉恆生指數:22445
股票代號	買入價	買入股數	沽出價	沽出股數	止蝕價	投資金額
(25/7)3938	0.86	20000			0.75	17300
(25/7)2222	4.17	5000			4.02	20970
(25/7)1198	3.58	4000			NIL	14420
					總投金額$	52690
					可用結餘$	47310