新手三大要訣之----第三要訣

             新手炒股第三要訣------時機!    其實即係投機入貨位.

             長線投資要看基本因素, 買入後坐到公司變質為止, 中間波動最好小理, 所以冇野講, 幾時入都得, 最重要係------耐性.

              投機就要找入貨時機......當一隻個股由1蚊升到3蚊時, 中間會有上有落, $1.2買, $1.6買同$2.2買就有很大分別.....之前都提及過, 炒股一定要放止蝕, 如果入貨時機唔好, 除時$1.6入正好股票要回吐至1.2, 咁就好易被震走. 就算$1蚊入都有可能先趺至0.8至大升到$3蚊.....又會被震走. 這種情況時時都碰到. 咁由$1蚊買入坐到$3蚊米得囉!...問題係可能會好長時間, 咁就係長線投資了.

              其實以恆指計, 年頭到年尾可能只會升2,3成, 但見一些基金大行可以賺4,5成.......WHY? 就係因為佢地把握時機, 炒作中間波幅或制造波幅來炒賣, 高沽低買來賺錢. $1蚊坐到$3蚊只賺$2蚊, 而且係長線投資, 只要選中好股比D耐性就OK. 但好多人都冇耐性, 而且更多人想食盡波幅賺$4,5蚊(但好多時坐定定賺得重多), 咁掌握時機就好重要.

               "技術分析"就係幫人攪呢家野. 如果唔知"技術分析"係咩, 就要去書店買D有關書籍睇下. 技術分析有好多種, 睇下你用開邊幾種係命中率高就長期用個種. 呢D係比較個人, 無一定的.

               我個人就用偷步/破位買入法再加一D輔助技術.......破位即股價作出突破時買入, 點解要突破先買而唔早D買?.....這是機會率的問題, 突破後上升機率大D而風險細D囉, 唔明可以睇書. 但缺點係賺小左......偷步即係當股價趺至支持位時, 估計會有機會回升而偷步買入, 但風險比較大, 因為個勢係向下, 好處係可以賺多D......而要找到支持位/突破位, 就要睇下個股的形態走勢來決定, 可能係RSI, 平均線, 保力加, 黃金比, 江思百分比, 三角, 長方...........等等等.(詳細真係要睇書)

                最後都要講句----"水能載舟也能覆舟", 時機把握唔好可能賺得重小或輸錢, 所以有好多人對圖表都不以為然, 應為長線睇基本先至最能賺錢. 我都應為長線先係王道, 睇下投資至富的名人都係長線投資者就會明白. 不過我個人覺得要做長線投資者是要有一定的條件.(可看之前文章)

新手三大要訣之----第二要訣

       新手炒股第二要訣------順勢.    咩勢?唔係氣勢.而係運勢加股票走勢.

       如果有玩過"話事啤"的人都知道派牌前都要落注先, 但一般不會大, 因為唔知會來咩牌, 到收到兩隻牌後先至決定再跟唔跟注或落幾多注碼. 如果派D牌都唔夠人靚或唔夠人大時---例如6,7派隻2...蛇又唔得, 又唔同花, 博"啤"都細過人, 唔通重跟注博"三條"咩, 咁就要馬上放棄(即止蝕)啦. 呢個就係派比你D牌的運勢同走勢.

       股票有升勢有趺勢, 升勢之中有趺勢(獲利回吐), 趺勢裡面又有升勢(超賣反彈), 如果有讀過"波浪理論"就應該知我講咩. 最重要落注時知道係咩勢就定咩策略.

       之前已講過買入股票後升趺的可能性是50/50, 很多人買入後股價下跌需要止蝕時總是左推右想, 想多兩野又再趺多D, 跟住又放棄止蝕, 打算等回升平手或蝕小D走人,點知又再趺多D,最慘係溝埋淡重死.......原因係佢唔知股票趺勢已成, 跟本無咁快會升或等N年都未必識升.(太多人係咁啦)........所以買股時最好先落一小注, 定5%止蝕(點解係5%就請看第一要訣), 由於是小注, 輸錢時都可以容易點止蝕(這是人的心理)如果咁到做唔到就最好不要炒股........

        當股價上升後, 那證明自己眼光無錯, 個勢係向上走, 等於派左"一對啤"比你, 咁就順住個勢落多注囉, 如果走勢強勁再升, 即係"三條"派到手, 運勢加走勢都咁勁, 咁米再落大注D睇位賺錢囉.......總之順勢炒作, 勝算就會高.

        但係即日鮮又唔同玩法, 由於只是捕捉一天內的波幅, (一般有3%已很好)所以一定要大注一點, 否則連手續費都唔夠比. 試想買50000萬賺1500, 買100000賺3000啊, 不過新手最好唔好玩即日.....因為即日講求----快,狠,準........得就得, 唔得就食忽得......所以好講求命中率和決斷力, 一感覺唔對路時.....不論賺蝕都要閃人. 新手就怕命中率唔高,出入多就蝕手續費都蝕死, 決斷力唔夠, 容易由即日變短線, 短線變中, 長線........

新手三大要訣之----第一要訣

        新手炒股第一要訣----止蝕!   止賺重要....但個人覺得止蝕更重要.....

        止蝕是保本的唯一方法, 如果你想在股海中生存, 那你一定要學會止蝕. 炒股只有一個目的----賺錢, 但如失去本錢, 那怕你會飛都冇用. 由其係職業炒手, 沒了本金也等於失業了.

        所有成功的投資/投機者, 他們都一定是滖雪球高手, 他們都董得保本, 因為要把雪球滾大, 最基本的要求是手上起碼都要有些小雪吧! 投資本身就是錢搵錢然後再搵錢的生意.......所以最重要本身就要有錢. 錢!錢!錢!

          我個人認為除非你真係在熊市低位入到貨, 而又好識得選股, D錢放係股市幾年都無所謂, 又可以忍受到股價上上落落都唔心動, 咁止蝕就變得多餘了. 因為你已是投資高手. 但相信大多數炒股的人都係出出入入的多. 便是高位沽左也會在更高位買回,風險便會越大, 所以一定要做止蝕. 如果應同止蝕的重要性, 那如何設置止蝕位便更重要了.

           如何設止蝕便要看個人入市時的策略了, 即日鮮就無法講, 因為主要是靠感覺行事.....吓?! 咁都得....沒錯, 的確是感覺, 因為這種感覺是長期在股場實戰而訓練出來的,就好像打牌時能感到三家是否造牌或棄糊, 又如SEALS能感到走進店裡的客人是買野定運桔般......

            至於短炒止蝕位.....初入行的最好把止蝕位放在買入後下跌5%, 因為一般短炒者每次買貨只追求10%回報(短炒不宜貪心). 初哥命中率一般不會高, 試想想...如果命中率是30%(如果連30%都冇咁就最好學多點基本功再入場好D, 又或用比例細點的本金多些實戰). 即買10次中3次, 每次賺10%而輸就5%, 那加起來就只蝕5%, 但如命中率是40%, (千萬不要看輕多一次命中率)即加起來有10%盈利了.....如能長期有40%命中率, 那已是"東方不敗"而又唔使練"葵花寶典"啦......,接著便是訓練提高命中率了, 如能去到70%至80%那你便是"獨孤求敗"了. 中,長線也如此類推.......總之入市前打算賺幾多, 咁就定一半止蝕......

              請記著1/2止蝕不是什麼賺錢方法或技術分析, 只是個人覺得這是新手炒股唯一保本的要點, 最好做到機械式, 不要放個人感情或主觀期望......因市場能令大多數人輸錢, 它已是超級高手, 它會吞噬你的期望而令人輸錢. 機械式能令它不能一Q清你袋, 令你有多點時間了解它, 慢慢摸清它的特性和運動模式 , 慢慢提高命中率,  從而建立自己的成功買賣系統.

突破小康,走向小富

        偶像"陸東"講過話佢從"幾萬變100萬還不是太辛苦,100萬變1000萬都好快,1000萬變1億是極快"嘩!這是一般人能說的話嗎?(唔怪得"巴菲特"可以變得咁有錢啦!)雖然說得有點狂傲,但佢的確係突破小康而至富.但不論"陸東"能變幾多億,"巴菲特"能賺幾多錢,他們都是由小小數萬元開始.也即是說大部份人都有機會至富,問題係點樣突破小康......

         "陸東"又說過"巴菲特"所謂的價值投資法其實只是一些普通常識,大部分人都明白,只是很小人有佢咁強忍耐力罷了.個人覺得"陸東"本身都是價值加機會投資者,佢唔會出出入入,所以冇止蝕呢家野.因為佢話自己入貨時機不是最低也是離底不遠.......

          其實長線能至富這個道理好多人都知,但我個人認為要成為能至富的長線投資者,起碼要是小康或接近小康,心目中要起碼有1000萬.....何解?因為個人覺得要幾萬變10萬很易,只要全部買中一隻會倍升的股票便可,要由10萬變100萬也可以很快,只要有膽識夠狠,願冒高風險.....但要由100萬變1000萬可說是極難.因如你只能由幾萬開始,你可能只是一名基層的市民,每月都只有一萬幾千的收入,為了想得到多點錢而買股票,你會用幾萬至10萬買一隻風險大的股,但當你已有100萬時,你會全部買入高風險股嗎?想信絕大多數基層市民都不會,通常都會分散風險,買些大股為主,小量炒賣細價股為次.這樣回報自然小,要達到小康便要用很慢長的時間了. 如每年回報有20%(已很好了)也要10幾年先到小康,但人生有幾多個10年?所以還會有那麼多人出出入入,希望用更短時間能達小康.....唉!時間真的是重點.

           到有1000萬時,你已能改善基本生活了,只要在低位買入一些幾倍PE,4--5%息的股票(好多時都有),單是收息己多過人工幾倍時,還不能輕鬆做長線投資嗎?小康和小富的生活也不是差很遠吧....在沒有生活壓力下,更能等待時機,低買高賣,食中兩次大浪便能輕易至富,只差時間罷了...........期待突破中.

      

好唔好溝淡?

       今天家父問我好唔好加注#330,問佢之前個注幾錢買.....$45,我只好說我唔讚成溝淡,佢好似好想買咁完全聽不入耳,由他....佢係老股民自然有自己的看法,點會聽D後背講,反而D"股評人"講咩都信到十足十.

       好多散戶都試過在大市下趺或驚下趺時會沽出手上有利潤的股票而保留蝕錢的股票....這就好比殺了會生金蛋的母雞而留下只會食飯拉屎和晨早嘈醒你的公雞.很多人買入股票而當股價上升後會很容易就沽出,但當下跌時就總是唔捨得沽或有股價會很快會回升的一相情願想法,當越趺越多時為了能快點返家鄉而溝淡,從而減低持貨成本.但這可能會令損失越來越大至不可挽回啊`.

        當然有很多人都試過溝淡後最終也能賺錢,但這可能是好彩....會否永遠都咁好彩呢?有升10倍的股票就自然有趺9成的股票.買入股票時當然覺得股價會再升或見底回升啦,但不可能每次睇中吧?!當買左一隻股票後有冇想過佢會升10倍或趺9成.....?升10倍一定好多人都有想過或期望過,但趺9成就好多人冇想過.但事實係......升趺的機率是50/50.

         我個人都會溝貨.....不過係越升越溝,因為我唔知佢會唔會升10倍,也不會有人知,但機率係50/50就要試,就算加貨之後下趺都可以輕鬆沽出,因為沽出一隻賺錢的股票比沽出蝕錢的股票容易得多(這是一般人的心理...高手除外).咁當然有人死唔斷氣話次次溝淡後都最終回本或賺錢,個人覺得那只是佢好運或佢願意冒趺9成的風險又或佢根本唔知有咁高風險啫......睇過很多出名的投資人如"曾淵倉"等.他們都是沽出下跌股票而加注上升股票的...咁是否買左一趺就沽呢?那是止蝕的問題了.

          

         

走回自己的路

      每個投資人都會有自己的炒賣系統.曾經有一段時間我沒有完全跟足系統買賣,WHY?因當時看見一位投資人的盈利很好,坐著兩隻股不足一年已可將本金番兩番......自己都買過#700$26但$30幾已走左重開心得很,但現在是幾多呢?$2蚊幾買過#135現在又幾多呢?是否系統比人差呢?很自然就會想到跟下人地.學人地睇基本,睇前景,睇長線(自己一直都是睇圖表短炒為主)本身都知道長線是王道,睇下被稱世界股神的"老巴"和香港股神"曾淵倉"就知.

       跟人期間有賺有蝕,但後來發現有些買賣和自己系統沖突太大,例如未有買入訊號就入貨,有沽貨訊號時又唔沽.....只想著基本因素好,公司前景佳等等.投放了太多個人主觀和期望,只想到將來會為我增加很多資本云云,而由得股價下跌沒有作出止蝕,忘了市場永遠是對的不能和它對著幹的道理,更忘了輸過大錢的痛苦.......導至有幾隻股票趺了三成多,現在一隻已止蝕,一隻剛反家鄉,兩隻還在低位呢....雖然最終都有機會返家鄉或賺錢,但期間不單心裡不快,還錯失很多賺錢機會呢.自己的性格是識合短炒坐唔到貨,強行改變性格做投資自然不順手,忐忑不安.

       自己的系統本身就包含了個人的風險,性格和忍受力,所以先會人人的系統都不同,自己的便只識合自己用.有些人可以坐幾年坐到有錢賺為止(可能是多餘錢),有些可以買入後唔理升趺有息收就OK(可能收息已夠開飯),但自己唔係,每次投資有懷疑,不安和壓力時都最好沽貨,只要是按策行動,賺蝕都會安心,因此經過系統改良(應該不斷改良的).2011年開始已完全按系統買賣,走回自己的道路.感覺好多了

   溯洄從之，道阻且長；溯游從之，宛在水中央。

入行歷程

         入咩行?當然係炒股呢行啦.自然要由第一次買股說起........

         家父是一位老股民,讀書時已見佢晚飯後就用D好細格綠色格仔紙係到唔知畫咩,後來先知係畫圖表(家庭電腦未入門之前我都用過呢種方法,真係眼水都出埋),有時見佢睇財經睇到笑,有時見佢住攞D印有"佳寧控股"字樣的紙張不停搖頭.......

         忘了是在1989定1990年的一天,家父突然問我想唔想賺錢,我當然點頭啦.於是佢攞張報紙指左幾隻股問我想買邊隻,當時加起D利事錢都只能買入一手"希慎興業".沒想到幾天後就話賺左兩千幾,嘩!原來賺錢咁易嫁?於是對股票有左好大興趣,就拿了父親的幾本譯成中文的投資書來看,睇左兩次都唔明.....

         後來出社會做事有左錢就自己玩下......後果唔講都知只有一個結果----蝕.咩國企狂潮,紅潮風暴都係蝕,期間重學人玩輪....當時又唔識止蝕,最後就當然係"輸服晒"啦,好彩人工低又多娛樂錢唔多,所以只係蝕好小.......唔輸過大錢唔知驚,97個下就20幾萬變幾萬,真係想死,果陣22歲出頭20幾萬已經好到冇朋友嫁......

          見過鬼自然怕黑,2000年就唔敢買當炒的科網股,最慘D大股又唔多升....不過好彩爆左都冇點輸錢.(識得驚原來都係炒股必需)不過就見識左D高財技----李澤佳,一隻奇股----電盈(咁大隻成分股可以趺9成9重唔奇)

          轉淚點係07年,記得當時恆指28000左右,有日見個平時只會飲花酒,打下牌的工友話佢老婆個FAN買股票賺左幾多幾多,佢老婆唔識股票都話跟買賺左幾多幾多.....有咁上下股齡的人都知時辰到啦,咁就自然清倉啦,重同D同事講個市要趺到18000,咁又好自然被人小到暈啦.點知個市重升個不停30000都破埋,當時真係後悔不已,個D股仔好似放煙花咁升到冇朋友啊(好彩冇沽期指)以為真係睇錯市....後來係點唔使講,最記得開始趺時(後悔冇沽期指)有位同事話隻2866趺左好多好低買,重大手入貨,我都叫佢唔好佢唔聽就只好笑住話祝你好運啦,(大老呀人地李超人做呢行都清佢倉你重入佢?唔通你醒過李生?)跟住原來係50步笑100步,我未到18000已開始入市,一路趺一路買...入到飽晒重一直趺....天呀(當時重唔識止蝕)沒想到可以見到萬一(真係唔怕一萬最怕萬一)矣.

          好境不常,公司做船務的生意不好要收當....失業,嘩!世界未日咩.公司係個行都算大都收當,其他公司都唔會請人啦,自己又未做過其他行業,左想右想自己只識買股票於是同老婆講想炒股為生,佢話好.....唔得先再找工作(佢可能唔知係不歸路)於是就正式入呢行.雙親當然反對啦,話炒股點可能為生?遲早輸清光云云(第二個講都得,他們可是老股民啊).開頭D親戚同鄰里見我經常在家會問我做咩工,我一般都係支吾以對,總覺好似唔見得光,壓力都好大,因為唔輸得,賺小過開支都好唔開心......後來慢慢找到自己的系統先開始好D(中間當然有好多過程).到了現在好似有D小成,雙親都講到唔想再講,D鄰里都已知我炒股,有時重問我買邊隻(可能見我炒咁耐都唔死得啩).現在有人問我做邊行我都會同佢講"我炒股的"...吓!咁都得!WHY NOT,THIS IS MY JOD.

         好多人都有錯覺炒股票唔係賺死就係輸死,重要係輸死比賺死的多99%....其實炒股可以只是一分職業(唔係專業),同做生意開舖一樣,都係用錢買賣野賺D錢啫,點解唔見得光?做生意會蝕錢炒股一樣會,不過個人覺得炒股風險重小D.....現在我只希望呢分工可以長做長有,因我已經回唔到頭......重希望將來可以有錢去下旅行呢.

任行天下,笑傲江湖

每個想在股海賺錢的人,都應該有自己的買賣系統,它是個人從股場不斷買賣實戰所得出的買賣方式,通常很小一開始就經常賺錢,一般都係由蝕多賺小而慢慢咁變成賺多蝕小.由於不可能百發百中,每隔一段時間便要改良,希望提高命中率,買中時賺多D,買錯時蝕小D,咁先可以在股海中生存,有得改良即有進步,所以我都不斷改良自己的系統希望命中率能做到80%....希望快D儲夠錢可以做長線投資者,即只炒大浪,收下股息都夠生活果種,不用經常出入,可以去下旅遊,享受下人生.....咁就真係"任行天下,笑傲江湖"^_^